Johan Huizinga

Staraí Ollannach a bhí i Johan Huizinga a chuir tús leis an stair chultúrtha mar chraobh léinn ar leith. Rugadh in Groningen é ar an 7 Nollaig 1872, agus fuair sé bás i mbraighdeanas Naitsíoch ar an 1 Feabhra 1945. Bhí tuiscint aeistéitiúil aige ar an stair, agus é ag cur béime ar an dráma agus ar an seó mórthaibhseach mar eochair do mheon na ndaoine a mhair fadó.

Is féidir an tuiscint seo a aithint sa mhórleabhar a scríobh sé faoi dheireadh na Meánaoise, ''Herfsttij der Middeleeuwen'' ("Fómhar na Meánaoise" nó "Ag Druidim chun Deiridh don Mheánaois" - ''The Waning of the Middle Ages'' agus ''The Autumn of the Middle Ages'' atá ar na haistriúcháin Bhéarla). Is é an leabhar seo is mó a shamhlaítear le hainm Huizinga inniu, ach scríobh sé a lán eile freisin, ar nós ''Homo ludens'' ("An Duine ag Súgradh", nó saothar staidéir ar ról an tsúgartha is an chluiche sa chultúr) agus ''Erasmus'', beathaisnéis Erasmus ó Rotterdam. Curtha ar fáil ag Wikipedia